SENTRU ATENDIMENTU INTEGRADU SERVE NIAN LOKE BA SERBISU

DILI, 3 Juñu 2013— Abertura Sentru Atendimentu Integradu SERVE (Serviços de Registo e Verificação Empresarial) asinala marku importante ida ba Governu Timor-Leste no ni-nia kompromisu ba realizasaun inisializasaun negósiu lais liu no fásil liu.
“Ami fiar Timor-Leste presiza setor privadu enérjiku no ativu ida. Ne’e abertura preliminar atu permiti empreza sira atu rejista no renova, dehan Vice Ministra das Finanças, Santina Cardoso, iha abertura SERVE iha 3 Juñu, 2013, iha Dili.
“Importante tebe-tebes atu empreza hotu-hotu – mikro, kik, médiu no bot – mai rejista iha SERVE; ho forma ida ne’e deit mak Governu bele hatene sa ida mak nia presiza atu halo hodi reforsa setor privadu.”
Desde 2008 governu, iha lideransa Ministério da Justiça ho parseria Korporasaun Finanças Internasional, IFC, halo ona mellorias ba sistema rejistu negósiu no lisensiamentu komerial hodi introduz prosedimentus lais liu, klaru liu, no simples liu.
Uluk empreza sira tenki ba vizita fatin ketak tolu iha ministérius governu nian em média dala 17 durante loron 94 ne’ebe sira presiza atu kompleta sira-nia dokumentasaun rejistu.
Ho Sentru Atendimentu Integradu SERVE empreza foun ida presiza loron lima deit atu kompleta prosesu inisializasaun no atu bele hahú operasaun komersial.
Estabelesimentu Sentru Atendimentu Integradu SERVE signifika emprezáriu sira bele ba fatin sentral ida no hetan sira-nia rejistru empreza, husu lisensa komersial no hetan sira-nia Númeru Identifikasaun Taxa (TIN).
“Desde hau-nia nomeasaun nudar CEO SERVE nian, hau nia ekipa no hau serbisu hamutuk ho IFC atu garante katak sistema hotu-hotu funsiona diak no garante katak emprezáriu hotu-hotu mai rejista sira-nia empreza no gosta experiénsia ne’e. SERVE prontu atu suporta empreza sira,” dehan Ofisial Xefe Ezekutivu (CEO) foun SERVE nian, Florencio Sanches.
“Hahú aban ita sei rejista empreza foun sira iha fatin ne’e iha fatin provizóriu SERVE nian iha Obrigado Barracks 2. SERVE sei muda ba ni-nia fatin permanente iha Colmera iha final tinan ne’e.”
Orasne’e Timor-Leste klasifikadu iha pozisaun 147 husi nasaun 185 iha termus hahú negósiu tuir relatóriu anual Doing Business 2013. Ne’e melloria ida husi klasifikasaun 2012 nian iha pozisaun 157 husi nasaun 183 no reflete reformas governu nian ba rejistru negósiu no sistema lisensiamentu iha nasaun ne’e desde 2011.
Atu hetan tan informasaun no atu download lista verifikasaun no formulárius rejistru negósiu nian, emprezáriu sira bele vizita www.serve.gov.tl k aba iha Sentru Atentimentu Integradu SERVE lokalizadu iha antigu komplexu NU Obrigado Barracks 2, iha Matadouro, Dili, Timor-Leste, ka telefona SERVE ba +670 3311315 ka +670 7810.5530.